NUG ကတိတည်ရန် ဗိုလ်နဂါးအဖွဲ့၏ တောင်းဆိုချက်များ တင်သမျှအဖြုတ်ချခံနေရ

NUG ကတိတည်ရန် ဗိုလ်နဂါးအဖွဲ့၏ တောင်းဆိုချက်များ တင်သမျှအဖြုတ်ချခံနေရ

NUG က တပ်ရင်းတစ်ရင်းစာ လက်နက်တပ်ဆင်ပေးမည့်ကတိအတိုင်း အမြန်ဆုံးတာဝန်ယူတပ်ဆင်ပေးရန် Facebook လူမှုကွန်ယက်စာမျက်နှာမှတစ်ဆင့် ထုတ်ပြန်‌တောင်းဆိုမှုများမှာ Report (Facebook ထံ တိုင်ကြားခံရ) လုပ်ခံနေရသည်ဟု မြန်မာတော်ဝင် နဂါးတပ်တော် -MRDA မှ သိရသည်။

မတ်လ (၁၃) ရက်က ဝန်ကြီးဦးရည်မွန်နှင့် တွေ့ဆုံဆွေးနွေးခဲ့စဉ် MRDA ၏ စာရင်းသွင်းတပ်များအားလုံးကို လက်နက်တပ်ဆင်ရန် မဖြစ်နိုင်သော်လည်း တပ်ရင်းတစ်ရင်းစာ တပ်ဆင်မှုကို ထို့နေ့မှစ၍ တစ်လအတွင်းပေးမည်ဟု ဝန်ကြီးက ကတိပေးခဲ့‌ကြောင်း ဆိုသည်။

ထို့ကြောင့် ကတိပေးထားသည့်အတိုင်း တပ်ဆင်ပေးရန် အကြိမ်ကြိမ်ဆယ်သွယ်ခဲ့သော်လည်း မရရှိသေးသည့်အတွက် ယခုကဲ့သို အင်တာနက်ပေါ်တင်ရခြင်း ဖြစ်ကြောင်း သိရသည်။

“တောင်းခံလွှာစာတင်သမျှ ကျွန်တော်တို့ရဲ့ Admin အကောင့်တွေအားလုံး Report ထိကြပါတယ်။ တောင်းဆိုနေတာကြာပါပြီ။”ဟု MRDA ၏ ထောက်ပို့တာဝန်ခံတစ်ဦးက ပြောသည်။

Facebook ၏ စည်းကမ်းများ၌ လူသတ်ရန်ကိစ္စများနှင့် လက်နက်ကိစ္စများကို ရေးသားပါက အလိုအလျောက်ပယ်ဖျက်သည့်စနစ်ကို ထည့်သွင်းထားသကဲ့သို့ မပယ်ဖျက်မိပါကလည်း တိုင်ကြားသူရှိလျင် ဖြုတ်ချမှုများ ရှိနေသည်။

 

ဦးရည်မွန်ကို ဗိုလ်နဂါးဦးဆောင်သည့် စစ်ကိုင်း ပြည်သူ့ကာကွယ်ရေးအင်အားစုများက လက်နက်တပ်ဆင်ပေးရန် အကြိမ်ကြိမ်ဆက်သွယ်ခဲ့သော်လည်း အကြောင်းပြန်ကြားမှုမရှိကြောင်းနှင့် စစ်ရေးကိစ္စ တိုင်ပင်ဆွေးနွေးရန် ဆက်သွယ်သော်လည်း အကြောင်းပြန်ကြားမှုမရှိကြောင်း ယ‌နေ့ထပ်မံ ထုတ်ပြန်ထားသည်။

ကာကွယ်ရေးဝန်ကြီးဌာန (MOD) ကို စာတင်မေးမြန်းထားသော်လည်း အကြောင်းမပြန်ဟု ဆိုသည်။ လက်ရှိအချိန်၌ အကြမ်းဖက်စစ်ကောင်စီက MRDA ရှိရာဒေသကိုဦးတည်ပြီး ချေမှုန်းရေးထိုးစစ်ဆင်ရန် ပြင်ဆင်နေသည့်အထားတစ်ခုကို ရင်ဆိုင်နေရသည်ဟုလည်း ထုတ်ပြန်ချက်တွင် ဖော်ပြထားသည်။

ထိုကိစ္စများနှင့်ပတ်သက်၍ တော်လှန်ရေးသမားအချို့က NUG ကို ဝေဖန်လျက်ရှိပြီး NUG ဘက်ကမူ မည်သည့်တုံ့ပြန်မှုမျှ မရှိသေးပေ။ MRDA ကို ဗိုလ်နဂါးဦးဆောင်သော စစ်ကိုင်းတိုင်း၊ ပုလဲဒေသရှိတော်လှန်ရေးသမားများဖြင့် စတင်‌ဖွဲ့စည်းခဲ့ပြီး NUG ကာကွယ်ရေးဝန်ကြီးဌာနတွင်လည်း တပ်ရင်းတပ်ဖွဲ့များစနစ်တကျပေးသွင်း၍ အသိမှတ်ပြုပူးပေါင်းပါဝင်ထားသည့် အဖွဲ့ဖြစ်သည်။crd

Leave a Reply

Your email address will not be published.